CHAMPHAI POLICE SDPO CHUAN ELECTRONIC CIGARETTE HMANGA MIPUI BUMTUTE AN VEH DAWN TIH A SAWI

C

Champhai District Tobacco Control Cell bultumin Dan kengkawhtu Police Officer te tan Prohibition of Electronic Cigarettes Act (PECA) chungchangah Training buatsaih a ni a, Pu V. Lalduhawma, SDPO Champhai chu khuallian a ni.

Pu V. Lalduhawma, SDPO chuan thusawiin, PECA 2019 chu Police te pawhin an hmelhriat tanna a nih thu a sawi a, dan tam tak zinga pawimawh tak pakhat a nih thu sawiin Police lam pawh insangmar a, he dan kengkawh tura theihtawp a inbuatsaih turin a chah a, e-cigarette hi an hriat dan tlanglawnah chuan meizuk thlahna tur tih a nih thu sawiin, bumin an lo awm reng, a ti a, hetianga mihring tana pawi leh hlauhawm tak hmanga mipui bumtute hi Police te chuan an veh tan tawh dawn, a ti a, he dan lekawh na kawngah khawngaihna dan a tel dawn loh thu a sawi bawk.

SDPO chuan tute pawh hian India Sawrkar in dan a siam te chu India khua leh tui an nih anga zawm hram hram turin a chah a, a bik lirthei khalh chungchangah tha taka dan zaqm turin lirthei khalh thinte a chah a, dan zawm hian himna min thlen thin tih hre reng turin a chah bawk.

He hun hi I&PR Conference Hall ah hman niin Dr. H. Lianthangpuia, State Nodal Officer, NTCP chuan a kaihruai a, vaihlo leh a kaihhnawih khuahkhirhna kawnga an thawhpui pawimawh tak chu Police te an nih thu sawiin zuk leh hmuam Mizo ten kan bansan theihna turin kawng hrang hranga theihtawp an chhuah mek thu a sawi a, kum tin vaihlo vang hian mi nuaih 80 vel an thi thin a chhut niin mi meizial khu lo hip chhawn leh atangin kumtin mi nuaih 13 vel thi thin anga chhut a nih thu a sawi a, vaihlo ai pawhin tunlaia lar em em electronic cigarette hi a hlauhawm zawk thu a sawi bawk.

He hun ah hian Pi Vanlalzari, State Legal Consultant, NTCP hnen atangin PECA 2019, Tobacco Control Laws chungchang sawiin, ICMR in a zirchiannaah chuan electronic Cigarette a tur hlauhawm mipuite laka ven nan leh mipuite hriselna venhimna atan India ramah titawp tura alo tih tawh thu a tarlang a, he cigarette ah hian Cancer veina chance sang tak nei Nicotine tam tak awmin ngawlvei awl tak a nih thu a tarlang a, e-Cigarette-a a tui bawm khatah hian Cigarette pack 20 a nicotine awm ang zat lai a awm tih a tarlang a, hei hian Cancer bakah lung natna, chuap natna leh thluak natna a  thlen thei tih a tarlang bawk. PECA 2019, Tobacco Control Laws chungchanga hriat tur pawimawh hrang hrang chipchiar takin a tarlang bawk.